- საქართველო 1:1 მონტენეგრო – შემადგენლობა და მატჩის გვერდი
საქართველოს 19-წლამდე ნაკრებმა, ევროპის ჩემპიონატის შესარჩევი ციკლის პირველი მატჩი მონტენეგროს წინააღმდეგ ჩაატარა, რომელიც დავით პეტრიაშვილის სახელობის სტადიონზე ფრედ – 1:1 დასრულდა.
შეხვედრაში პირველი ხიფათი 22-ე წუთზე ჩვენ კარში დანიშნულ თერთმეტმეტრიანს მოჰყვა, რომელიც დაჩი ჩოჩოშვილმა მოიგერია. მეორე ტაიმის 56-ე წუთზე შეხვედრაში ანგარიში ანდრია ბართიშვილმა გახსნა, რომელმაც მის მიერ მოპოვებული პენალტი ზუსტად გამოიყენა.
ჩვენი გოლიდან მალევე, 58-ე წუთზე, ანდრია ვუკოემ თავური დარტყმით წონასწორობა აღადგინა და მატჩის საბოლოო ანგარიში დააფიქსირა. ზურაბ ხიზანიშვილის გუნდი, შემდეგ შეხვედრას 9 ივნისს, ისლანდიის წინააღმდეგ გამართავს, ხოლო მანამდე, 6 ივნისს ერთმანეთს მონტენეგრო და ისლანდია დაუსპირისპირდებიან.
6 ივნისი | ისლანდია [19:00] მონტენეგრო | დავით პეტრიაშვილი
9 ივნისი | საქართველო [19:00] ისლანდია | დავით პეტრიაშვილი [LIVE]
ახალი ფორმატის მიხედვით, საკვალიფიკაციო ეტაპი 3-რაუნდიანი გახდა და A და B ლიგებად დაიყო. ფინალურ ეტაპზე, მესამე რაუნდში, ჯგუფის გამარჯვებული 7 გუნდი მოხვდება, რომლებსაც მერვე გუნდად, მასპინძელი ქვეყანა დაემატებათ.
